កណ្តាល៖ នៅព្រឹកថ្ងៃទី០១ ខែឧសភា ឆ្នាំ២០២៦ មានគ្រឿងចក្រមួយគ្រឿងបានចុះ​មក​ឈូស​ឆាយលើដីកំពង់មានវិវាទនៅប្តឹងតវ៉ានៅឡើយ ភាគីម្ខាងគោរពច្បាប់មិនចូលទៅធ្វើ​អាស្រ័យផលនៅលើដីទំនាស់ទេ តែភាគីម្ខាងធ្វើអាស្រ័យផលរឿយៗមិនព្រមឈប់ដល់​ចុង​ក្រោយ​ត្រូវតុលាការកាត់ក្តីឱ្យភាគី​មិនគោរពច្បាប់ឈ្នះក្តី ហើយភាគីគោរពច្បាប់ត្រូវចាញ់ក្តីទាំងរងនូវភាពអយុត្តិធម៌ ស្ថិតនៅភូមិចំការដូង ឃុំសំរោងលើ ស្រុកអង្គស្នួល ខេត្តកណ្តាល។

យោងតាមសម្តីរបស់លោក ពិន គុណ បានប្រាប់មកអ្នកសារព័ត៌មានយើងខ្ញុំថា កាលពីថ្ងៃទី២៣ ខែមេសា ឆ្នាំ២០២៦ បានដាក់ពាក្យបណ្តឹងទៅក្រសួងយុតិ​ធម៌ ដើម្បីស្នើសុំអន្តរា​គមន៍ពីឯកឧត្តម កើត រិទ្ធ ឧបនាយករដ្ឋមន្ត្រីក្រសួងយុត្តិធម៌ ជួយអន្តរាគមន៍ជូនលោកយាយ រហូត​មកដល់​ថ្ងៃទី០១ ខែឧសភា ឆ្នាំ២០២៦ ខាងភាគីជាកូនៗរបស់ឈ្មោះ ផន ផល បានយក​គ្រឿងចក្រមកឈូសឆាយលើដីទំនាស់ តើគាត់មានអំណាចអី ឬក៏អាងថា តុលាការ​បាន​កាត់​ឱ្យពួកគាត់ឈ្នះក្តី តែលោកយាយនៅបន្តនីតិវិធីប្តឹងតវ៉ាមិនព្រមឱ្យដីកេរ្តិ៍ពីឳពុកម្តាយរបស់​លោក​យាយបានទៅអ្នកដែលរំលោភចង់បានដីគេទេ។

លោកយាយបានបន្តថា តុលាការកាត់ឱ្យភាគីខាងកូនៗឈ្មោះ ផន ផល ឈ្នះដោយសម្អាង​លើឈ្មោះ ផន ផល បានអាស្រ័យផលតាំងពីឆ្នាំ១៩៧៩ ចុះខាងតុលាការមិនឆ្ងល់ទេអីថា ហេតុអីបានខាងឈ្មោះ ផន ផល មិនមានលិខិតបញ្ជាក់កាន់កាប់ដីតាំងពីជំនាន់នោះមក ព្រោះឈ្មោះ ផន ផល បានសុំជួលដីឳពុកលោកយាយ ហើយក៏អាស្រ័យផលចាប់ពីឆ្នាំ១៩៨៦ ទេគឺឆ្នាំដែលគាត់បានសុំជួលដី ហើយក៏មិនព្រមចេញពីដី នៅតែបន្តអាស្រ័យផលរហូតដល់​បច្ចុប្បន្ននេះ បើទោះជាលោកយាយខំប្តឹងតវ៉ាយ៉ាងណាក៏ដោយ និយាយរួមគឺលោកយាយ​មិន​បាន​ធ្វើអាស្រ័យផលលើដីរបស់ខ្លួនដោយសារភាគីខាងឈ្មោះ ផន ផល មិនឱ្យចូល។

សូមបញ្ជាក់ផងដែរថា លោក ផាន់ មឿក អតីតមេឃុំឆក់ឈើនាង ក៏បានរៀបរាប់ប្រាប់មកអង្គភាពសារព័ត៌មាន​យើងខ្ញុំថា ដីនោះពិតជាដីរបស់លោកតា ស្រស់ ពិន ពិតមែនដោយមាន​ឯកសារដីបញ្ជាក់ ហើយលោកក៏ទើបតែដឹងពេលថ្មីៗនេះដែរទេថា គេបានលើកដីរបស់តាពិន ទៅដាក់នៅភូមិសំរោងលើ ហើយដីនោះពីមុនដី តាពិន នៅក្នុងដែនអាជ្ញាធរឃុំឆក់ឈើនាង ហើយ​ដី តាផល នៅក្នុងដែនអាជ្ញាធរឃុំសំរោងលើ  គឺដីខាងលើជាក្រវ៉ាត់ព្រំដែនដីទាំង២ ហើយលោកក៏ទើបតែដឹងថា អាជ្ញាធរឃុំទាំង២ជាមួយការិយាល័យភូមិបាលស្រុកអាចដោះដូរដីពីភូមិមួយទៅភូមិមួយបាន ហើយបើតាម​លោកដឹងទាល់តែមានសាលក្រមពីតុលាការទើបអាចផ្លាស់ប្តូរដីពីភូមិមួយទៅភូមិមួយបាន។​

លោកយាយ ពិន គុណ ស្នើសុំអន្តរាគមន៍ពីឯកឧត្តម កើត រិទ្ធ ឧបនាយករដ្ឋមន្ត្រីក្រសួងយុត្តិធម៌ និងតុលាការកំពូលជួយអន្តរាគមន៍ចុះស៊ើបអង្កេតសារជាថ្មី ចំពោះរឿងដីវិវាទរបស់​លោកយាយផង ព្រោះលោកយាយមិនបានទៅធ្វើអាស្រ័យលើដីខ្លួនឯងបានទេព្រោះគេមិនព្រមចេញពីដីរបស់លោកយាយ ហើយមួយវិញទៀតដោយលោកយាយដឹងថា ដីទំនាស់គឺមិនមាន​ភាគីណាមួយអាចទៅអាស្រ័យផលនៅលើដីនោះបានទេ។

អង្គភាពសារព័ត៌មានខ្មែរឦសានយើងខ្ញុំបានព្យាយាមស្វែងរកលេខទូរស័ព្ទទំនាក់ទំនងទៅ​ភាគីកូនៗរបស់ឈ្មោះ ផន ផល នៅតែមិនមានលេខដើម្បីទាក់ទង ហើយប្រសិនបើភាគីកូនៗ​របស់​ឈ្មោះ ផន ផល ត្រូវការបកស្រាយបំភ្លឺទៅលើករណីខាងលើនេះសូមទាក់ទងអង្គភាព​សារព័ត៌មានយើងខ្ញុំរង់ចាំទទួលការបកស្រាយបំភ្លឺបន្ថែមគ្រប់ពេលនិងម៉ោងធ្វើការ៕